Dongeng: Pitik lan Bebek

PITIK LAN BEBEK

Ing sawiji dina ana Pitik lagi diwenehi pakan dening sing duwe. Lagi enak-enake Pitik mangan, liwat Bebek mlaku megal megol. Bebek sing weruh Pitik lagi mangan, banjur takon marang Pitik “Tik, kowe lagi mangan apa ta? Kok, kayake enak.” Jawabe Pitik marang Bebek “iki lho, aku lagi mangan dedak.” Ora ngomong apa-apa Bebek banjur nyosor melu mangan pakane Pitik. Pitik ora trima amarga Bebek ora ngomong disik, akhire Pitik dadi nyeneni Bebek, banjur ra tau gelem dolan bareng Bebek.

Ora let suwe saka kedadean kuwi, Bebek dolan menyang omahe Mentog, teka kana Mentog karo anak-anakke lagi mangan dedak. Pada karo kedadeane Pitik, Bebek langsung nyosor bae, melu mangan dedak pakanane Mentog. Malah pakanane Mentog langsung entek  dening Bebek, anak-anakke Mentog langsung pada nangis amarga pakanane entek. Mentog banjur nesu marang Bebek. Nanging Bebek ora jaluk apura malah langsung lunga.

Awit saka kedadeane Pitik lan Mentog, kabeh warga desa iku dadi nyeneni Bebek. Saiki Bebek wis ra duwe kanca maneh, wis ra ana sing gelem didolani Bebek. Bebek nelangsa banjur mlaku marang kali kang ana ing wetan desa. Ing kana Bebek ketemu karo ibu e kang lagi ngadusi adhi-adhine. Ibu e Bebek takon “bek, kok kowe ora dolan karo kancamu? Kok malah marang kene.” Jawabe Bebek “aku nelangsa bu, saiki kanca-kancaku pada ora gelem dolanan karo aku.” Takone Ibu malih “lha, kowe nakal si marang kanca-kancamu. Jare Mentog gek wingi kowe melu-melu mangan pakane Mentog ora ngomong disik, banjur entek ning kowe.” Jawabe Bebek “Nggih bu.” Pawelinge Ibu “mulane bek, dadi bocah kuwi sing sopan, aja rakus. Nek kepengin pakane kancane ya ngomong. Nek diwenehi aja ngentek-enteke. Malah nek bisa kowe sing aweh marang kanca-kancamu.” Jawab Bebek “Nggih bu.”

Sawise diomongi Ibu, Bebek dadi sadar nek deweke kuwi salah mulane kancane pada ora gelem dolan bareng. Bebek banjur mlayu buru kanca-kancane. Banjur jaluk apura, lan ngomong bakal ora ngulang maneh. Maune kanca-kancane durung gelem aweh apura, nanging sue-sue kancane pada precaya maneh marang Bebek lan aweh apura. Bebek saiki wis duwe kanca maneh, wis dolan bareng kanca-kancane maneh. Malahan saiki Bebek wis apikan, nek Bebek lagi diwenehi pakan dening sing duwe, Bebek nyeluk kanca-kancane dikon mangan bareng. Kanca-kancane Bebek pada seneng kabeh, amarga Bebek saiki wis bener maneh, ora nakal kaya winginane.